|
 Рэдакцыйная заўвага
Рэдакцыя Гістарычнага Альманаху атрымала звесткі пра публічныя абвінавачванні нашага часопісу ва ўжыванні антысемітыцкай тэрміналогіі, выказаныя гісторыкам сп. Эмануілам Іофэ. Абурэнне сп. Іофэ выклікала выкарыстанне ў часопісе слова “жыды”. Сп. Іофэ ніколі не звяртаўся да нашай рэдакцыі з якімі-небудзь прэтэнзіямі ці заявамі, але неаднаразова выказваў свае абвінавачванні на навуковых паседжаннях і канферэнцыях. Такім чынам справа атрымала розгалас сярод навуковай грамадскасці.
У сувязі з гэтым рэдакцыя лічыць неабходным паведаміць наступнае:
1. Прыпамінаем сп. Іофэ, што Гістарычны Альманах выдаецца на беларускай мове, у якой этнонім “жыд” не мае ніякага абразлівага значэння і не заключае ў сабе якіх-небудзь негатыўных адносінаў да прадстаўнікоў акрэсленага ім этнасу. Рэдакцыя дадаткова звярнулася па кансультацыю да вядомага спецыяліста па беларускай мове доктара філалагічных навук прафесара Паўла Стэцко. Вось яго заключэнне: У жывой беларускай мове слова “жыд” не мае абразлівага значэння, а слова “яўрэй” адсутнічае. З’яўленне ў пісьмовай мове калькі з рускай - “яўрэй” (габрэй) то праява русіфікацыі нашай краіны. Дарэчы, да прыходу савецкай улады слова “еврей” не выкарыстоўвалася і ў літаратурнай рускай мове. Напрыклад, у творах Пушкіна, Лермантава ўсюды ўжываецца слова “жид”. Выкарыстанне слова “жыд” у часопісе, які друкуецца на беларускай мове, поўнасцю адпавядае лексічным і літаратурным нормам гэтай мовы.
2. Паведамляем сп. Іофэ, што праз выкарыстанне слова “жыд”, пад Вашу прыватную дэфініцыю антысеміцкай лексікі падпадаюць акрамя беларусаў таксама палякі, чэхі, славакі і інш. еўрапейскія народы.
Рэдакцыя
Публікуецца на сайце з
ласкавай згоды Рэдакцыйнай Рады "Гістарычнага
Альманаху"
|
Польскі аўкцыён
