Прадмова аргкамітэту і рэдакцыі
Рашэнне пра правядзенне ІІІ навуковай канферэнцыі* Беларускага гістарычнага таварыства (БГТ), прысвечанай праблеме тэрміналогіі айчыннай гістарычнай навукі, было прынята ў Магілёве ў лістападзе 2001 г. на пасяджэнні Выканкама БГТ.
Арганізацыйны камітэт канферэнцыі складаўся з сяброў Выканкама Валянціна Голубева, Аляксандра Краўцэвіча і Алеся Смаленчука. У якасці месца правядзення канферэнцыі планаваўся гістарычны факультэт БДУ. Аднак на нашае здзіўленне дэкан гістфаку дацэнт Сяргей Ходзін, які два дні выпрацоўваў рашэнне, не дазволіў выкарыстаць для правядзення канферэнцыі адну з вольных аўдыторыяў гістфаку. Аднак канферэнцыя не была сарваная. Месцам навуковых дыскусій стала ўтульная заля бочнага нефу былога бернардынскага касцёлу, дзе месціцца Беларускі Дзяржаўны архіў-музей літаратуры і мастацтва.
З навуковай часткай канферэнцыі праблемаў не было. У правядзення навуковых абрадаў БГТ ужо выпрацавалася пэўная традыцыя. Каб не парушаць цэласнасць збору, мы не стасуем падзелу на секцыі. Дакладчык пасля свайго выступу выслухоўвае і занатоўвае пытанні, на якія адказвае ўжо ў канцы пасяджэння. Потым адбываецца дыскусія, у якой бяруць удзел не толькі ўдзельнікі канферэнцыі, але і ўсе прысутныя. Пытанні, адказы і выступы запісваюцца на дыктафон для далейшай публікацыі.
Выказваем шчырую ўдзячнасць сп. Ганне Запартыка і сп. Алесю Запартыку за дапамогу ў арганізацыі навуковых абрадаў. Асаблівая падзяка за матэрыяльную падтрымку ў правядзенні канферэнцыі належыць Цэнтру грамадзянскай адукацыі “Польшча-Беларусь” (Беласток) і сп. Іллі Глыбоўскаму з фундацыі "Чалавек у бядзе" (Чэхія).
Галоўным заданнем ІІІ канферэнцыі БГТ была акцэнтацыя ўвагі на праблеме, якая набыла асаблівую вагу ў сённяшні пераходны перыяд Беларусі ад таталітарызму да незалежнасці і дэмакратыі. Вялізны паняццёва-тэрміналагічны пласт, атрыманы ў спадчыну ад БССР, засмечаны ідэалагізаванай і зрусіфікаванай ненавуковай тэрміналогіяй. Ён патрабуе грунтоўнай рэвізіі і дастасавання да рэаліяў незалежнай краіны, якая атрымала магчымасць самастойнага аналізу і ацэнкі свайго мінулага.
Праблемай зацікавіліся гісторыкі суседніх краінаў. Свае тэксты прыслалі двое ўкраінскіх калегаў. Традыцыйна ў канферэнцыі прымалі чынны ўдзел сябры Беларускага гістарычнага таварыства ў Польшчы – ягоны старшыня доктар Алег Латышонак і прафесар Яўген Мірановіч. Таксама прысутнічаў старшыня Беластоцкай філіі Польскага гістарычнага таварыства доктар Ян Ежы Мілеўскі.
Публікацыя матэрыялаў зробленая ў звычайным парадку: пасля тэксту выступу змешчаныя пытанні да дакладчыка і ягоныя адказы. Пасля пасяджэння (аднаго ці больш) адбывалася дыскусія і ў такім жа парадку яна змешчана ў часопісе. Даклады, якія не агучваліся на пасяджэннях, друкуюцца ў адпаведным тэматычным раздзеле.
* І канферэнцыя БГТ “Праблемы айчыннай гістарыяграфіі” адбылася ў студзені 2001 г. у Гародні (Гл. Гістарычны Альманах. Том 4). ІІ канферэнцыя БГТ “Праблемы перыядызацыі гісторыі Беларусі” прайшла ў Магілёве ў лістападзе 2001 г. (Гл. Гістарычны Альманах. Том 7).
Публікуецца на сайце з
ласкавай згоды Рэдакцыйнай Рады "Гістарычнага
Альманаху"
Польскі аўкцыён
