IN MEMORIAM
Многія выкладчыкі і слухачы “Народнага Універсітэта” памятаюць гэтага чалавека, яго цікавыя лекцыі, разумныя разважанні, вясёлыя анекдоты і аповяды, ведаюць яго па-сапраўднаму навуковыя працы. Ён вельмі любіў Беларусь, любіў жыццё, але, на жаль, зусім нядаўна яго не стала.
Уладзімір Пятровіч Емельянчык (09.05.1955 г. – 05.06.2003 г.) нарадзіўся ў вёсцы Вялікія Лукі Баранавіцкага раёна. Пасля заканчэння школы вучыўся на гістарычным факультэце Беларускага дзяржаўнага універсітэта, які паспяхова скончыў у 1980 г. Працаваў выкладчыкам у Мінскім інстытуце культуры, а з 1990 г. – навуковым супрацоўнікам Інстытута гісторыі Нацыянальнай акадэміі навук Беларусі. У 1987 г. абараніў дысертацыю і атрымаў вучоную ступень кандыдата гістарычных навук.
Чытачы, студэнты, усе, хто цікавіцца гісторыяй роднай краіны, звязваюць імя У.П. Емельянчыка ў першую чаргу з яго працамі, прысвечанымі вывучэнню нацыянальна-вызваленчага паўстання 1794 г. пад кіраўніцтвам Тадэвуша Касцюшкі, даследаванню дзейнасці кіраўніка паўстання. Гэта кнігі – “Нарадзіўся я ліцвінам...” (сумесна з Я. Юхо), Мн., 1994, і “Паланез для касінераў: (З падзей паўстання 1794 г. пад кіраўніцтвам Т. Касцюшкі на Беларусі)”, Мн., 1994. Здаецца самі паэтычныя назвы гавораць пра тое, з якой любоўю і шчырасцю душы пісаліся гэтыя працы. Дарэчы, Уладзімір ствараў выдатныя вершы, вельмі добра спяваў. Ён як ніхто з беларускіх гісторыкаў шчыльна і з зацікаўленасцю займаўся палітычнай гісторыяй Беларусі другой паловы ХVІІІ ст., узаемадачыненнямі Княства і Кароны. Ён рыхтаваў новую кнігу, збіраўся абараняць доктарскую дысертацыю.
Апошнія гады жыцця У.П. Емельянчыка былі звязаныя з гістарычным факультэтам Беларускага дзяржаўнага універсітэта, дзе ён працаваў дацэнтам. Але не толькі – ён выкладаў гісторыю ў Беларускім гуманітарным ліцэі, ездзіў па краіне з лекцыямі Народнага універсітэта... На жаль, сэрца не вытрывала. Памяць пра Ўладзіміра застанецца ў яго працах і ў сэрцах людзей, якія яго ведалі.
Валянцін Голубеў, Аляксей Хадыка
Публікуецца на сайце з ласкавай
згоды Рэдакцыі часопісу ФІЛАМАТЫ
Польскі аўкцыён
