“Дзяўчынка…дзяўчына…жанчына”
Рэжысёр полацкага тэатра-студыі “Гармонія” Валянціна Нагорная рыхтуе са сваім моладзевым складам тэатральнага калектыву цікавую пастаноўку. Спектакль будзе называцца музыкальна-драматычнае дэфіле “Дзяўчынка…дзяўчына…жанчына”. Нагорная, працуючы над матэрыялам да спектакля, выкарыстала шмат класічных твораў сусветнай літаратуры, у якіх дзейнічаюць адметныя, моцныя гераіні. Нагорная тлумачыць, што ёй не падабаецца, калі сёння распранаюць жанчыну і яна ходзіць па подыуму. Нагорная пераканана, што гэта ў нейкім сэнсе ператварае жанчыну ў рэч. Прыгажосць жанчыны павінна праяўляцца ў эмоцыях, думках, учынках. У сваім новым авангардным спектаклі рэжысёр будзе прапаноўваць гледачам паразважаць над роллю жанчыны і яе лёсам, над эвалюцыяй ад дзяўчынкі да жанчыны. У пастаноўцы шмат музыкі, феерычнасці, пластыкі і руху.
Нагорная тлумачыць, што яна гэтым спектаклем не пайшла ўслед модным сёння ідэям жаночай эмансіпацыі і розным гендарным вучэнням. Не паўплывала на рэжысёрку і тое, што кнігу пра любоў і жаночыя лёсы піша Святлана Алексіевіч. Усё досыць празаічна. У моладзевым складзе “Гармоніі” засталіся толькі акторкі, для іх і прыдумала Нагорная такую пастаноўку – без хлопчыкаў і мужчын. Вынаходлівым і авангардным сёння часам прымушаюць быць абставіны. Прэм’ерны паказ спектакля павінен адбыцца напрыканцы сакавіка.
Алесь Аркуш
Зазірні на мой сайт
Прадстаўнік у Наваполацку грамадскага аб’яднання “Праваабарончы цэнтр “Вясна” Зміцер Салаўёў.
www.navapolack.org
- Наш сайт з’явіўся ў Інтэрнэце напачатку лютага. Гэта сайт дэмакратычных няўрадавых грамадскіх арганізацый Наваполацка. Пакуль што на сайце прадстаўлены чатыры грамадскія арганізацыі, гэта тыя, якія ўжо падалі матэрыялы пра сябе: наша “Вясна”, а таксама “Крок разам”, “Усяслаў Чарадзей” і “Новы горад”. Мы плануем стварыць на базе гэтага сайта рэгіянальны інфармацыйны партал. Ужо маем наступныя раздзелы: “Устойлівае развіццё”, “Экалогія”, “Палітыка”, “Гумар”. Неўзабаве з’явіцца раздзел “Правы чалавека”. Будзем змяшчаць інфармацыйныя і аналітычныя матэрыялы. Зараз на сайце можна пазнаёміцца і з кандыдатамі ў дэпутаты мясцовых Саветаў, якія прадстаўляюць няўрадавыя дэмакратычныя грамадскія арганізацыі Наваполацка.
Адзінага рэдактара ў інтэрнэт-рэсурса няма, ёсць людзі, якія адказваюць за пэўныя раздзелы. Спадзяёмся, што сайт будзе “жывым”, з частым абнаўленнем. Запрашаем іншыя грамадскія арганізацыі Наваполацка да супрацоўніцтва.
Выкладчыца беларускай мовы і літаратуры Полацкай нацыянальнай гімназіі Тамара Гарэлікава.
www.pgng.narod.ru
- Гэты сайт зрабілі вучні 10 “Б” нашай гімназіі Саша Куцькін і Міша Глушакоў. Збіраць матэрыялы яны пачалі перад зімовымі канікуламі, а ўжо ў студзені сайт з’явіўся ў Інтэрнэце. На гэтым сайце можна знайсці інфармацыю пра нашу навучальную ўстанову: задачы, традыцыі, дасягненні, тут змешчаны імёны пераможцаў вучнёўскіх алімпіядаў. На сайце можна даведацца: хто выкладае ў гімназіі, хто скончыў яе ў розныя гады, пра нашу традыцыю школьнага самакіравання.
Адмоўным бокам гэтага інтэрнэт-рэсурса з’яўляюцца памылкі ў беларускіх тэкстах. Трэба, хлопцы, выпраўляцца.
Старажытны малюнак вярнуўся ў Полацк
Летась у Полацку прайшла чарговая Міжнародная канферэнцыя “Гісторыя і археалогія Полацка і Полацкай зямлі”, падчас якой вядомы даследчык Полаччыны, доктар гістарычных навук Георгій Штыхаў перадаў Полацкаму гісторыка-культурнаму музею-запаведніку ўнікальную археалагічную знахоку – старажытны малюнак на бяросце. Гэты артэфакт быў знойдзены ў Полацку яшчэ ў 1961 годзе, але быў “згублены” сярод шматлікіх археалагічных трафеяў і не быў уведзены ў актыўны навуковы ўжытак.
З’яўленне на белы свет гэтай знаходкі выклікала сярод полацкіх гісторыкаў дыскусію. Мясцовы даследчык гісторыі, спецыяліст па старажытнай геральдыцы Анатоль Трафімаў лічыць, што знаходка захоўвае шмат таямніцаў: да якога часу належыць?, што азначае малюнак? (Трафімаў убачыў у малюнку “выяву жаночай фігуры з нейкім круглым прадметам каля левага пляча”), чаму малюнак наколаты, а не накрэслены? і г.д.
Гісторык, археолаг, выкладчык ПДУ Дзяніс Дук лічыць, што гэта сапраўды ўнікальная знаходка, але наўрад ці захоўвае шмат таямніцаў. Дук упэўнены, што на бяросце намаляваны воін з шаломам на галаве і шчытом у руце. Гісторык мяркуе, што малюнак, хутчэй за усё, выкананы нейкім падлеткам, можа вучнем старажытнай школы, і ніякай сакральнай таямніцы ў сябе не нясе.
Алесь Козік
Польскі аўкцыён
