|
 АД РЭДАКЦЫІ
Тэма Беларускага Рэзыстансу (Супраціву) ў ХХ стагодзьдзі была і застаецца важнай, актуальнай і што крыўдна— маладасьледаванай. Нешматлікія публікацыі беларускіх і замежных гісторыкаў, як правіла, асьвятляюць толькі асобныя яго эпізоды, але не даюць агульнай карціны. Дый зрабіць гэта на сёньняшні момант амаль немагчыма — доступ да адпаведных архіўных крыніцаў у Беларусі абмежаваны. Аменавіта цяпер трэба было б актыўна друкаваць дакумэнты-першакрыніцы, на якіх грунтаваліся б будучыя дасьледаваньні па гісторыі Беларускага Рэзыстансу. Адна з нашых задачаў — выправіць у лепшы бок гэтую сытуацыю.
“Беларускі Рэзыстанс” — часопіс найноўшай гісторыі нашай краіны, які будзе прысьвечаны найперш Супраціву. Дакумэнты і лісты, успаміны і дасьледаваньні — усё, што дагэтуль пылілася ў прыватных і дзяржаўных архівах,у Беларусі і за мяжой, знойдзе месца на бачынах нашага выданьня.
Часопіс заснаваны аднайменным незалежным выдавецтвам, якое толькі распачынае сваю дзейнасьць. Ягонай задачай зьяўляецца выданьне дакумэнтаў, дасьледаваньняў, успамінаў па гісторыі беларускага вызвольнага рухуХХ стагодзьдзя. Адначасова з кніжкамі, мы будзем выдаваць і квартальнік“Беларускі Рэзыстанс”.
Варта зазначыць, што сваімі папярэднікамі мы лічым шэраг эміграцыйных выданьняў, але найперш бюлетэнь “Дакуманты і факты. Архіў Беларускага Вызвольнага Руху”, які выдаваўся ў 1950-ыя ў Нью-Ёрку і Таронта ды на сёньняшні дзень ужо не існуе.
Наш часопіс доўга ішоў да чытача, бо ідэя яго выданьня ўзьнікла яшчэ ў сярэдзіне 90-х, але рэалізацыя, па розных прычынах, неаднаразова адкладалася.За гэты час, на жаль, ня стала некалькіх вэтэранаў вызвольнага руху, якія павінны былі ўзяць удзел у нашым выдавецкім праекце. Але іх парады і прапановы тут улічаныя.
Заклікаем усіх нашых карэспандэнтаў да актыўнай супрацы. Толькі разам мы зможам аднаўляць забытыя старонкі нашай славутай мінуўшчыны.
Публікуецца
на сайце з ласкавай згоды Рэдакцыі
Беларускага Рэзыстансу
|
Польскі аўкцыён
