|
 1984. ПЕРШЫ МАГНІТААЛЬБОМ
ГУРТ СУЗОР'Е  "Рок-тэрапія"
“Сузор'е” можна лічыць першым рок-гуртом Беларусі ў поўным сэнсе гэтага слова, бо ніхто дагэтуль у нашай краіне не наважыўся граць такую “празаходнюю” музыку, пабудаваную на цяжкіх гітарных рыфах. Што цікава, гурт нават узялі на сталую працу ў Філярмонію ў 1981 г., іх дзейнасьць была “ўзаконеная”. Да гэтага часу з 1977 г. музыкі выступалі ў асноўным у сталічнай кавярні, якое й дало назоў групе — “Сузор'е”. Але ўлетку 1983 г. скончылася “культурніцкая адліга”, выкліканая правядзеньнем у СССР Алімпійскіх гульняў. Міністэрства культуры вырашыла выправіць становішча ў савецкай музыцы ды забараніць дзейнасьць некаторых асабліва модных сярод моладзі музычных гуртоў. Сярод усіх пад гэтую справу трапіў і менскі гурт “Сузор'е”. Па словах удзельніка калектыва Андрэя Філатава супраць іх былі накіраваныя колькі “гнеўных допісаў” і групу расфармавалі на загад Мінкульта БССР. Маўляў, “музыкі правакуюць моладзь на недастойныя паводзіны”.
Тым не менш, удзельнікі гурта засталіся на працы ў Філярмоніі. “Хацелася мець стабільную працу, граць на добрай апаратуры, а пайшлі б тады ў падпольле, былі б зараз на адной прыступцы з “Машиной времени” і “ДДТ”,— згадвае Філатаў. “Сузор'е” пераўтварылася ў акампанавальны састаў Сьвятланы Кульпо, Надзеі Мікуліч. У 1984 г. у вольны ад філярманічнай працы час, музыкі сабраліся ў сутарэньнях Тэатральна-мастацкага інстытуту, дзе рэпэтаваў тады гурт “Студыя 7” (будучая “Бонда”), каб запісаць матэрыял, назапашаны цягам некалькіх год. Дзеля гэтага запісу нават запрасілі зь Ялты сьпевака Аляксандра Брынцава, які выступаў раней з “Сузор'ем” на адказных гастролях. З дапамогай стужкавага магнітафона й мікшэрскага пульта “Электроніка” за тры дні запісалі з тузін песень. Гукарэжысэрам быў Іван Чвялёў, на адной зь песень — “Где мы были вчера” (яна не ўвайшла ў канчатковую вэрсію) — на губным гармоніку падыграў Ігар Варашкевіч. Альбом намагаліся зрабіць цэласным, вытрыманым у стылістыцы хард-року, таму шмат вядомых песень на касэту так і не патрапілі (“Сентябрьская река”, “Падарожжа”, “На шляху дзікіх гусей” ды інш.).
Тыражаваньнем таго запісу адмыслова ніхто не займаўся, але ён разышоўся па краінах СССР прыкладным накладам у 10.000 асобнікаў. У 1988 г. на “Мелодыі” выйдзе кружэлка “Сузор'я” “Сентябрьская река”, куды з “Рок-тэрапіі” патрапілі песьні “Фортуна”, “Старый мост”, “Капитан”. 10 тысячаў асобнікаў тады не хапіла, прыйшлося рабіць яшчэ адно выданьне.
“Сузор'е” распалася ў 1991 г. Аляксей Казлоўскі й Валянцін Пучынскі зьехалі ў Амэрыку, Андрэй Філатаў і Аляксей Казлоўскі граюць зараз у “Mojo Blues” (а Філатаў яшчэ бубнач у “Краме”), Аляксандр Брынцаў сьпявае ў маскоўскіх рэстарацыях. У 2000 г. старыя запісы “Сузор'я”, у тым ліку “Рок-тэрапія” і так не скончаная рок-опера “Песьня пра зубра”, былі перавыдадзеныя на дысках. На сваё 25-годдзе ў 2003 г. гурт сабраўся ізноў, каб даць некалькі канцэртаў у тойсама кавярні на вул. Б.Хмяльніцкага, дзе ўсё пачыналася. Але гісторыя “Сузор'я” скончылася ўсё ж на мінорнай ноце: увосень 2003 г. у Чыкага заўчасна памёр Валянцін Пучынскі.
Сяргей БУДКІН ДЫСКАГРАФІЯ 1. “Рок-тэрапія” (МС 1984, СD 2000)
2. “Сентябрьская река” (LP, 1988)
3. Сузор'е і Нэлі Дзенісава (СD, 2000)
Публікуецца на
сайце з ласкавай згоды Беларускага
Калегіюму
|
Польскі аўкцыён
