|
 Лявон Юрэвіч
- дзейны сябра Беларускага Інстытуту Навукі й Мастацтва (Ню Ёрк), сябра рэдакцыйнай калегіі часапісу "Запісы БІНІМ", сябра Прэзыдыуму Рады БНР, ганаровы сябра Беларускага ПЭН Клюбу.
Нарадзіўся 30.06.1965 у Менску. Па заканчэньні менскай сярэдняй школы #35 працаваў у дзіцячай бібліятэцы. У 1983 г. паступіў на філялягічны факультэт Беларускага Пэдагагічнага Ўнівэрсытэту імя Максіма Танка (тады - Максіма Горкага), які скончыў (з перапынкам на службу ў арміі) у 1990 г. Выкладаў беларускую мову ў Лінгвістычным Унівэрсытэце. У 1990 г. паступіў у аспірантуру Інстытуту Літаратуры Акадэміі Навук Беларусі. У 1993 г. выехаў у ЗША. У Ню Ёркаўскай Публічнай Бібліятэцы працаваў у Славянскім Аддзеле (1993-1995), у Аддзеле Архіваў (да 2000). З 2000 г. узначальвае аддзел Падарункаў і Абмену.
Магістар філялёгіі. Mагістар бібліятэказнаўства. Л. Юрэвічу належыць аўтарства дасьледаваньняў "Архіўная кніга" (Ню Ёрк, 1997); "Беларуская мэмуарыстыка на эміграцыі" (Ню Ёрк, 1999), "Камэнтары" (Менск, 1999), "Жыцьцё пад агнём. Партрэт беларускага ваеначальніка й палітычнага дзеяча Барыса Рагулі на фоне яго эпохі" (Менск, 1999), "Вырваныя бачыны. Да гісторыі СБМ" (Менск, 2001), "Літаратурны рух на эміграцыі" (Менск, 2002). Ягоныя артыкулы друкаваліся ў зборніках "Вяртання маўклівая споведзь" (Менск, 1994), "Культура беларускага замежжа" (Менск, 1998), "Пераклад збліжае народы" (Менск, 2002), "Роля беларускай дыяспары ў захаваньні і разьвіцьці беларускай культуры" (Лёндан, 2003), "Запісах БІНІМ" (Ню Ёрк), энцыкляпэдыі "Гісторыя Беларусі" (Менск) ды інш., пэрыядычных выданьнях Беларусі, ЗША, Ангельшчыны. Укладальнік, аўтар уступных артыкулаў, камэнтароў, бібліяграфій, рэдактар выдадзеных у БІНІМ зборнікаў Ул. Дудзіцкага (1994), М. Цэлеша (1995), Юркі Віцьбіча (1996), Лявона Крывічаніна (1998), Антона Адамовіча (2003). Укладальнік (разам з В. Грышкевіч) бібліяграфічнага паказальніка "Фр. Скарына. Жыццё і дзейнасць" (Менск, 1995). Аўтар запісу й літаратурнай апрацоўкі ўспамінаў Б. Рагулі "Беларускае студэнцтва на чужыне" (Ню Ёрк, 1996). Піша мастацкія творы (драма "Загадка Антона Адамовіча" - ARCHE, 2000). Шчыльна супрацоўнічае зь
Беларускім Гістарычным Аглядам (каардынатар Г. Сагановіч), дзе пры ягоным удзеле выйшлі кнігі С. Кандыбовіча "Разгром нацыянальнага руху ў Беларусі", Ф. Кушаля "Стварэньне беларускага войска", М. Панькова "Хроніка беларускага жыцьця на чужыне, 1945-1984", "Слуцкі збройны чын 1920 г. у дакумэнтах і ўспамінах" ды іншыя.
|
Польскі аўкцыён
