|
 Уступ
1999 год стаў годам заканчэньня легітымнасьці Аляксандра Лукашэнкі як прэзідэнта Рэспублікі Беларусь. У 1994 годзе шляхам дэмакратычных выбараў ён быў абраны на пяцігадовы тэрмін. Аднак увосень 1996 году А. Лукашэнка з дапамогаю, як сьведчаць міжнародныя назіральнікі, у тым ліку прадстаўнікі Еўрасаюзу і АБСЕ, незаконнага, несвабоднага і несправядлівага рэферэндуму падоўжыў тэрмін сваёй улады да сямі гадоў.
Члены Канстытуцыйнага суда і дэпутаты парламенту, якія супрацьстаялі узурпатарскім і дыктатарскім намерам Лукашэнкі былі звольненыя. Права грамадзянаў на законную зьмену ўлады было дыскрэдытавана.
Спроба легітымнага Вярхоўнага Савету 13-га скліканьня на чале з Сямёнам Шарэцкім правесьці выбары прэзідэнта Рэспублікі Беларусь, падтрыманая буйнейшымі апазіцыйнымі партыямі і рухамі, была сустрэтая жорсткім супраціўленьнем, рэпрэсіямі супраць арганізатараў і ўдзельнікаў выбарчай кампаніі. У барацьбе з апанентамі за захаваньне ўлады рэжым Лукашэнкі ня грэбаваў самымі бруднымі і антыдэмакратычнымі метадамі. Ніводная акцыя апазіцыі не абышлася без арыштаў, без перасьледу яе арганізатараў альбо ўдзельнікаў, без папярэджаньняў, штрафаў альбо зьняволеньняў... А яшчэ 1999 год стаў годам перманентных выступленьняў беларускага народу супраць навязанага ўладамі саюзу з Расіяй, годам спробаў прадстаўніцтва АБСЕ наладзіць дыялог паміж уладамі і апазіцыяй, годам небывалай колькасьці ўзбуджаных крымінальных справаў супраць кіраўнікоў апазіцыйных партыяў і рухаў, удзельнікаў масавых акцыяў пратэсту, годам зьнікненьняў ды нечаканых сьмерцяў вядомых палітыкаў і змагароў з рэжымам...
Праваабарончы Цэнтр «Вясна» канстатуе, што сітуацыя з захаваньнем правоў чалавека ў Беларусі ў 1999 годзе значна пагоршылася.
На працягу году ПЦ «Вясна» крок за крокам фіксаваў шматлікія парушэньні рэжымам Лукашэнкі правоў грамадзянаў Беларусі. Вынікам гэтай працы і стаў прапануемы «Агляд-Хроніка...»
Публікуецца на сайце з ласкавай
згоды Праваабарончага Цэнтру Вясна
|
Польскі аўкцыён
